SKONT L-GĦAJDUT IL-MUMENT AĦĦARI TAL-IMĦABBA META X-XITAN JOQGĦOD BILWIEQFA WARAJK U JAQRA L-ITTRA T’IMĦABBA LI TKUN QED TIKTEB

Il-ħemda li qed taqa’ fuqna qed taqa’ fuqna minn fuqna u hi u nieżla qed tinħall f’għargħar

Spiċċajna mgħarrqin ġo soddtna stess

Fuq it-televixin il-Prim Ministru qed jindirizza lill-poplu iżda mhu indirizza lil ħadd għax m’għad fadal ħadd

Għaddieli ħsieb u ser naqbad u nibgħatlek imejl

Kemm ngħidlek li nixtieqek tferra l-lejl ġo fija u jekk infur ibqa’ għaddej

Darba kien hemm raġel u qalli storja fuq żrinġ u dik it-tfajla li tatu x’jiekol u ħbietu fi friexha

Darba kien hemm raġel u poġġa jdejh fuq dahri fejn ħalla marka mikwija forma ta’ ċrieki konċentriċi linji mqabbża mifruxa mrewħa

Bħal meta l-għasafar tal-Ġenesi ttestjaw ġwenħajhom għall-ewwel darba jien inftaħt rixi mqajjem bħallikieku qatt ma tqasqast

X’ġara mill-istorja mill-ħolma minnek minn meta ħabbilt saqajja ġo saqajk billejt subgħajja ġot-tajn

Kif spiċċajt jien kif jien u mhux int kif int ngħawweġ il-jien li jien għalik

Hemm int dieħel ġo dari qisek mhux int subgħajk jagħfsu fuq kull fejn ġismi għalik jirtab tħolli l-għoqiedi

Kemm int tqil kemm int sabiħ tgħix ġo fija sakemm nisparixxi u noħroġ minn ġo fik

Għaddieli ħsieb

Forsi nista’ nifrex xagħri minn naħa għal oħra tal-kontinent Ewropew u nħallik timtedd fuqu għekiesek fil-Baħar Mediterran għonqok fis-silġ

Jekk nilagħbu l-karti sabiex nissetiljaw id-dejn ta’ bejnietna tilqagħli d-dmugħ mit-tebqiet t’għajnejja iddewwili l-infafet ta’ fuq

ilsieni lesta ngħallmek kull ma naf fuq il-kosmoloġija u l-prinċipji tal-mekkaniżmu ċelestjali

Arana aħna planetarji ġejjin u sejrin skont l-istaġun

Sadanittant fuq it-tapizzeriji xeni ta’ gwerer imdemmija żwiemel mejta raġel u tfajjel feruti f’agunija f’għajnejhom

dija stramba

Qed ngħidlek li qed ngħidlek dan kollhu għaliex iktar ma jmur iż-żmien iktar qed inħoss ġibda lejn il-vjolenza li jġib miegħu r-raxx

tad-dlam u m’iniex lesta li nitlef kollox jekk mhux għal wiċċek niedi miksi fjuri slavaġ

Diġà nsejtek ibżax

Int babaw u qed taqra din il-poeżija fid-dlam

Illejla fil-ġnien erġajt poġġejt xufftejja fuq wiċċek ħġieġa

Ġismi qattar l-għasel in-nemus dar għalina l-art intrefgħet u għelbitni għal ġo fik

Naħseb aħjar naħsbulu u nidħlu ġewwa għidtli

Sirt naf dak li minn dejjem kont naf li huwa dak li kont naf imma qatt ma stajt niftakar

Isma din fil-bidu kollox ma kien xejn u ma kienx hemm bidu